Jamu Kanggo Nglancarake BAB

Sing dikarepake BAB yaiku “buang air besar” utawa bebuwang. Wong sing ora lancar anggone bebuwang jenenge bebelen, sembelit, utawa istilah kedokterane konstipasi.

Yen normal saben dina wong mesthi bebuwang kanthi lancar, sethithike sepisan. Nanging ana kalane anggone bebuwang ora lancar, angel banget. Anggone ndhodhok neng WC meh sak jam meksa ora bisa bebuwang. Sebabe werna-werna, merga pola mangan sing ora bener,  kurang ngombe, mentas lara nemen, stroke, ana masalah ing usus besar, merga pengaruh obat-obatan, lan sapanunggalane. Sebab liyane merga umure wis tuwa (lansia). Umume wanita sing umure sandhuwure 65 taun kerep ngalami bebelen. Wanita mentas babaran uga kerep ngalami konstipasi senajan durung mesthi kabeh ngalami mengkono.

Yen bebelen coba dhahar kates sing akeh lan ngunjuk banyu putih  4-6 gelas. Biasane bisa bebuwang. Nanging yen tetep angel coba ngunjuk jamu racikan kaya ing ngisor iki. Aja dikulinakake ngunjuk obat pencahar (urus-urus), mundhak kulina lan gumantung marang obat mau. Apa wae tanduran obat sing bisa nglancarake BAB?

 

Pace, Mengkudhu

Woh pace diarani woh ajaib merga kasiyate bisa nambani maneka warna penyakit. Woh pace ngandhut alkaloid triterpenoid lan morindon. Zat morindon iki sing bisa nglancarake BAB. Carane gawe jamu, njupuk pace mateng loro sing gedhene sedhengan dikumbah sing resik terus diparut banjur diperes banyune, disaring. Ditambah uyah sethithik banjur diombe. Sedina ngombe kaping pindho esuk lan sore. Merga ambune ora enak, umue wong wegah ngombe sari pace asli. Bisa mundhut ing toko obat sari pace gaweyan pabrik farmasi, rasane luwih enak lan ora mambu pace.

 

Godhong Wungu (Graptophyllum pictum)

Godhong wungu ngandhut zat-zat steroid, saponin, tanin, alkaloid nontoksik lan lendir. Saponin bisa marakake “mencret entheng” (mild laxative). Mula uga kena kanggo obat ambeien utawa wasir. Carane, godhong wungu sing seger 7 lembar digodhog karo banyu 2 gelas nganti kari sagelas. Anget-anget disaring, diombe. Sedina ngombe kaping pindho esuk lan sore sawise dhahar.

 

Ilat Baya (lidah buaya)

Ilat baya ora mung kanggo nyuburake rambut, nanging uga kena kanggo tamba tatu lan nglancarake bebuwang (bebelen). Mundhut ilat baya setugel wae, dikumbah sing resik terus dionceki kulite. Daginge dicacah banjur dicom banyu umob 1/2 cangkir. Yen wis adhem ditambah madu 1-2 sendhok dhahar terus didhahar nganti entek. Sedina katindakake kaping pindho. Wanita sing lagi ngandhut utawa sing lagi haid ora kena  mangan  jamu iki. Semono uga wong sing pencernaane ringkih, gampang mencret, ora kena mangan jamu iki.

 

Temulawak

Temulawak sajempol dionceki dikumbah resik banjur dirajang tipis diwadhahi gelas ditambah gula Jawa sacukupe. Dicom banyu umub ditutup sing rapet. Yen wis anget diudhak, disaring banjur diunjuk. Sedina kaping pindho utawa kaping telu.

 

Keji beling

Keji beling utawa Strobilanthes crispus ngandhut kalium, asam silikat, natrium, kalsium lan pencahar sarta diuretik (mbancarake seni). Carane gawe, njupuk godhong keji beling setengah gegem dikumbah resik banjur digodhog karo banyu 2 gelas nganti kari separone. Yen wis adhem disaring, diombe.

Sajrone ngombe jamu tradisional kudu ngunjuk banyu putih sing akeh, aja ngunjuk kopi lan teh. Nanging yen wis ngunjuk jamu meksa durung bisa bebuwang prayogane menyang dokter utawa puskesmas wae.

Ature: Nuniek

JB 50/LX, 13-19 Agustus 2006

4 Balasan ke Jamu Kanggo Nglancarake BAB

  1. Sismanto mengatakan:

    iki sing tak goleki,
    suwun yo Mas Aku kangen pisan. wis suwe gak ngganggo boso Jowo.

  2. ibu yati mengatakan:

    Assalamu’alaikum,
    buat jeng nuniek, maturnuwun banget amargo maringi racikan2 jamu iki, aku pancen golek’i racikan jamu gawean dewe sing koyo mengkene,mturnuwun yo.

    mas Sismanto, piye kabare, aku yo seneng iso nganggo boso jowo. sak suwene iki aku raono konco arep ngomong jowo, bojoku wae wong kelantan, tambah angel, yo wes iki wae disik yo.

  3. herbaqu mengatakan:

    ingsun awit sepriki kagungan ramuan kagem bebuang kang lancar.pengalaman kulo jamu racikan piyambak kulo waget BAB 2-3X sedina tanpa ngganggu aktifitas amargi mboten maraake murus, BAB lancar/normal.e.e sakniki malah kawula dadosake ikon produk kulo.sinten kemawon pengin utawa mbatahaken produk kulo hubungi kulo wonten ing 08529 259 8181
    rencang kulo ingkang kenging batu ginjal injih wonten perubahane ngunjuk jamune kulo asmane pak siswanto salam magelang

  4. timmy karo raymon mengatakan:

    suwun aku isa ngising sing lancar maturnuwun yo mas he.,..he..,..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: