Ana Naga Mabur ing Langit

Nalika dumadi lindhu gedhe dina Setu Wage kepungkur wong-wong sing padha ngenut lan nyinaoni kultur Jawa racake slamet. Ora mung ing bab fisik nanging uga merga batine pasrah lan tentrem. Lan diweruhi tengara gaib sing jumedhul sadurunge ana lindhu.

Ngono pangandikane Ki Mardiyuwono (53 taun) Ketua Himpunan Penganut Kepercayaan Kepada Tuhan YME Bantul, DIY, nalika ditemoni ing daleme ing Gedongsari, Wijirejo, Pandak, Bantul.

Ketua HPK Bantul sing uga sesepuh Paguyuban Kebatinan Sumarah Purba iki ngendika menawa warga HPK Bantul nalika ana lindhu gedhe dina Setu Wage kepungkur akeh sing slamet. Senajan ana sing lara nanging ora nemen.

Minangka ketua Satkorlak Bantul dheweke ngaturake panuwun marang Sekjen DPP HPK Drs. KRT Basuki Prawirodipuro SH, MBA, MM, MHum saka Surabaya kang aweh bantuwan lan kawigaten marang para korban. Uga Yunita Dewi anggota HPK saka Cilacap, Andri Tanuwijaya saka Toko 84 Jogjakarta, LSM telu saka Jakarta, Semar Suryokencana, Naga Sakti Grup, Yayasan Maha Pelita Budha, lan Cerdas Bangsa.

Ing ngisor iki wawancarane JB karo Ki Mardi bab lindhu gedhe kasebut:

Kadospundi sadereng lan sasampunipun lindhu, napa wonten sasmita gaibe?

Lindhu gedhe iku tekane dina Setu Wage. Sepasar sadurunge, malem Selasa Kliwon aku kungkum ing tempuran Kali Bedog lan Kali Progo ing Nglancar. Kala kungkum jam loro tekan jam telu bengi ana bisikan gaib. Bisikan iku munine: limang dina maneh utawa sepasar maneh akeh omah sing ora dienggoni.

Bisikan mau wiwitane ora takgatekake, takanggep biasa. Ing dina Setu Wage 27 Mei 2006, wayah Subuh aku digugah dening budheku sing wis tilar donya, Budhe Mangundiharjo. Ora takgatekake. Setengah lima digugah maneh tetep ora takgatekake. Bareng setengah enem jempol sikilku diangkat dhuwur banjur diceblokake, aku terus tangi, lan metu saka omah.

Lindhune teka, wong-wong padha pating brengok, omahe padha ambruk. Padha metu ing dalan gedhe ngarep omahe. Lan ndeleng langit sisih kidul wetan, ana sing padha alok: “Ana naga, ana naga!” Aku uga meruhi dhewe tekane naga sing rupane ireng lan saka cangkeme metu asep ireng. Mabure cepet banget. Apa wae sing diliwati, ing ngisore lemah lan omahe padha bengkah lan ambruk. Mabure ora pati dhuwur, arahe ngalor kaya kilat. Naga iku sakawit metune ora kaya naga, nanging saya suwe saya katon wujude naga. Ing sandhuwure kutha Bantul ana sing weruh ing angkasa ana wewujudan ali-ali sing warnane ireng. gedhe, saantena parabola.”

“Ing pinggir Kali Bedog ana wong lagi nderes wit klapa, rumangsa kaya weruh gajah nglangi ngebaki Kali Bedog. Ngosek-ngosek lan sing diliwati rusak kabeh. Nek dilelimbang ramalan Jaya Baya kae pancen ana benere. Sing baku ing jaman Kalatidha ana telung bab sing kudu diugemi manungsa. Sepisan nyeraki awake dhewe, alam, lan Gusti Sing Akarya Jagad. Telu-telune kudu nyawiji.”

“Sapa aku satenane lan kudune piye supaya slamet,” ngono sing ditakokake ing batine dhewe. Sawise ngono nyeraki alam lan Gusti Sing Akarya Jagad. Lan maca kersane Sing Kuwasa saka tandha-tandha jaman. Bab iku saiki akeh sing ora nggatekake.

 

Sing ngabari tiyang pun tilar donya, Ki?

Sistim gaib iku pancen alat. Cara BMG ana lempengan tanah sing owah. Basis BMG pancen ngono. Nanging, cara mata batin beda maneh. Ora bisa dideleng lan mbonceng kahanan. Lan wong sing wis mati kuwi ngerti luwih dhisik. Contone kaya aku digugah budheku sing wis tilar donya. Sadurunge wong urip ngerti, wong sing wis mati iku menehi firasat gaib. Nanging kahanan iku biasane ora digape, sing dijibake mung perane BMG thok, saengga batin rasane ilang. Nalika digugah sepasar sadurunge iku sejatine wis ana dhawuh, ya mung ora ditegesake nek arep ana lindhu gedhe. Kaya pengalaman ing Parangkusumo, Parangtritis, jadah bisa malih dadi kembang.

Kanggo taun 2008 kudu diati-ati maneh, jalaran malem 1 Sura tiba 1 Pebruari, dinane Setu, Tumbuk Menda. Bebayane awujud angin ing pulo Jawa sisih wetan. Taun wingi banyu wis ngamuk ing Aceh. Bumi wis ngamuk ing DIY lan Jateng. Lan mengko angin ing taun 2008. Bumi, banyu, angin, geni rak kekuwatane manungsa. Kekuwatane manungsa ora beda kaya kekuwatan alam: bumi, banyu, angin, lan geni.

Wong racake ora sadhar menawa badane duwe kekuwatan sing bisa dimanfaatake karo alam, lan awake dhewe bisa manfaatake alam. Dadi wong bisa komunikasi karo alam lan kabeh bisa disiasati supaya slamet. Tembunge laraa ora banget-banget.

 

Naga lan gajah gaib niku wonten sing nggerakaken?

Gajah sing nglangi ing Kali Bedog lan naga ing angkasa mbarengi lindhu iku ana sing ngomandho. Malem Senen Wage, jam enem kurang seprapat diamati Gunung Merapi ngirim pega. Ing Parangtritis, Parangkusumo, katon semburan awan panas, soklat abang mlakune ngetan terus ngidul. Dene ali-ali ireng ing dhuwur kutha Bantul akeh sing weruh.

Pengalaman gaib sing ana sesambungane karo kedadeyan alam, ngerti lan orane gumantung pancadriya kaeneme wong iku dhewe. Utawa kawaskithan kita dhewe.

Eman dene wong Jawa saiki wis lali Jawane. Kudune wong Jawa bisa among tamu ing tanah Jawa nanging malah dadi tamu. Bara-bara bisa momong jagade dhewe, wong karo basane wae wis lali! Sandhangan Jawane ya wis lali. Sing dienggo duweke wong kana. Milike dhewe ora digunakake. Dadi, istilahe wong Jawa lali Jawane lan mbebayani.

Sadurunge kabeh anasir saka jaba mlebu, ajaran Jawa niku pun wonten. Wong Jawa mediatore akeh, klebu slametan. Contone bubar panen pari, wong biyen yen arep tandur maneh menehi kembang, minangka atur panuwun marang alam, amarga wis menehi asil, lan ora ana ama sarta wereng.

Sasuwene iki alam mung diidak-idak. Minangka jejere wong Jawa sakehing tumindak kudune ya kanthi cara kultur Jawa. Dadi nek wong Jawa ora nganggo kultur Jawa, ya wis resikone. Dadi, nek ana apa-apane ya tanggungen dhewe.”

Nalika ana lindhu gedhe kae wong sing nyinaoni laku kejawen untunge ora mung mandheg babagan fisik wae, ning batine uga tentrem lan pasrah. Papan sing kanggo meditasi, semedi, cerak karo alam lan karo awake akeh slamete, klebu padhepokanku Sumarah Purba. Lan kuncine slamet mung siji: teguh, timbul, rahayu, slamet, slamet, slamet.”

Ature: R. Dwi S.

JB 47/LX, 23-29 Juli 2006